الخطوط التركية - ما تشوفون شر

قبل شهرين كان لازم أروح لندن و مانشستر عشان أشيك عالجامعات اللي قبلوني حق الماجستير و اختار منهم

المهم دشيت اكسبيديا عشان أشيك الأسعار و الرحلات

 لقيت انه أرخص طيران التركية و عقبه القطرية

التركية كانت ب 560 دينار و القطرية ب 920

طبعا البرتش حزتها ب 1400 و الاتحاد ب 1700 دينار

قولبتها براسي

قلت الفرق بين التركية و القطرية يكفي الفندق بهالأربع ليالي

و بعدين الاثنين بزنس يعني هاو باد كود ات بي

أنا مجربة التركية من قبل مرة

بزنسهم مو سيء وايد

إي مو فراش

بس هم مو مأساة

و بعدين الدولمة كانت خيال

سألت رفيجاتي عن رايهم بالموضوع

ثلاث أرباعهم قالوا انتي من صجج؟؟؟

التركية ظيم و معروف انه معاملتهم زفت و مواعيدهم مو شي و فوق كل هذا طياييرهم مو ثقة و احتمال انج تموتين ضحية التركية وارد

دفعي ال 400 و ستري على عمرج

و لا سافري ايكونومي عالبرتش ب 300 دينار

قلت ايكونومي لاااااااا و انتوا تدرون ليشششش - رقم 13

سويت جوجل على حوادث التركية و اخترعت

صج تاريخهم مرعب

عاد من الفضاوة دورت على سجلات الطيران الثانية

طلعوا الباجي مو وايد أحسن

و بعدين الربع المؤيد للتركية قالوا اذا بتموتين بعد بيكون يومج تركية و لا غيرها

وفري فلوسج و توكلي على الله

و على طاري الموت أنا كنت قارية نبوءة بداية السنة تقول انه القطرية بتطيح لها طيارة هالسنة

فجاة حسيت اني عايشة رشيد اهي و نبوءة الاغتيال مالتها

فتخيلوا مو كافي أدفع زيادة لا و أموت

الزبدة توكلت على الله و حجزت عالتركية

ركبت الطيارة

و لأ مو صج

بزنسهم عبارة عن جزيرة بلس

كراسي ايكونومي و بينهم حاجز بس

لأ أبي أظيم

خنقتني العبرة

بس حزتها ما يفيد الندم

و نفسية المضيفات مو صج

هذا و انا راكبة بزنس 

عيل الايكونومي مساكين شيسوون فيهم؟؟؟

فناقر و طراقات؟؟

أبي أخمد مو قادرة

و الرحلة الساعة 2 الفير

يعني لا لي خلق اقرا و لا اطالع تلفزيون

أصلا ماكو تلفزيوووون

كانوا أطول ثلاث ساعات بحياتي

وصلنا مطار اسطنبول

دشيت اللاونج

بطلت لاب توبي اللي شايلته على قلبي لأنه عشتو حده رقيق 

أحاول أدش النت

ماكو نت

هااااو ليش

سألت الجماعة قالوا إي ماكو نت إلا إذا عندج خط تليفون تركي

هااااو شكوووووووو

قالوا بس فور سيكيوريتي بربوزس

واااااااي يعني صج عسرني أكثر

يعني يا أستخدم كمبيوتراتهم يا ماكو انترنت

المهم طرشت ايميل حق رفيجاتي اللي كلش ما يحبون الشماتة و قلت لهم خلااااص توبة أروح عالتركية 

عقب أربع ساعات من النطرة القاتلة دشينا الطيارة

و لا أشوف شييييييييييييي

الفراش شي ما شفته بحياتي

لا تقولون برتش و لا اتحاد

أكبر فراش شفته بحياتي

قلت الحمدالله من عقب الجزيرة الله عوض صبري خير

نمت نومة عميقة اللي حتى أكل الطيارة اللي وايد أعزه ما كليته

رديت طرشت ايميل حق اللي ما يحبون الشماتة و قلت يا جماعة غيرت رايي

التركية عجيبة

فراش و لا بالأحلام

المهم

خلصت من لندن و رحت مانشستر

و الردة كانت من مانشستر لي اسطنبول

ركبت الطيارة و لا لأ مو صج

وين الفراش؟؟؟

شهالتعلق؟؟؟

جزيرة بلس مرة ثانية؟!؟

يعني مو حاشمين و مكشخين الا خط لندن

لا و الطيارة تأخرت ساعتين نطرناهم بالطيارة

كابوووووووس مو سفرة

آخر محطة اسطنبول كويت

و النفسية زفت

و مابي شي الا فراشي

و لا من يقعد يمي

توأم ريل هيفا 

وااااااااااي ليشششششش

لا و يبي يسولف بعد مع ويهه

عاد المصري لي بغى يصير دونجوان صج ما ينبغى

استريييييح زين

يعني حتى نهاية الرحلة شي يسد النفس

الحين سفرتي عقب أسبوع عالقطرية

وش مي لك بليز

و مبارك عليكم الشهر